Obradoiro de Tempos para compartir impartido polo interiorista Javier Suárez arredor dos trucos de decoración necesarios para engadirlle valor a unha vivenda que se queira poñer á venda.
Suárez é un reputado decorador que nos últimos tempos se especializou no home-staging ou, dito doutro xeito, na ambientación de vivenda para que lle cause unha boa impresión a calquera persoa interesada en comprala.
O home-staging combina o gusto polo detalle e a combinación de elementos -mobles, cortinas, a pintura, iluminación, etc.- de cara a crear unha imaxe acolledora de calquera inmoble.
Porén, os consellos de Suárez tamén serviron de orientación para as 25 persoas participantes no obradoiro de cara a converter os seus fogares nun lugar máis agradable onde vivir.
Próximo obradoiro: elaboración de pan
O próximo Tempos para compartir celebrarase en Naraío o sábado 5 de marzo e estará dedicado á elaboración de pan artesán nun forno de leña tradicional. Neste caso contarase coa colaboración de Lois Anxo Rodríguez -director do CPI e exdirector da escola de hostelería de Pontedeume-, da tamén profesora do colexio Pilar Charlón e do veciño da parroquia Juan Manuel Vega.
No obradoiro faranse bolos tradicionais, pero tamén se mostrará a preparación de panificacións máis actuais, como por exemplo as fogazas recheas de froitos secos. Só se ofrecen 12 prazas que se cubrirán por orde de inscrición dándolle prioridade a persoas empadroadas no municipio. Para apuntarse é necesario chamar ao 981 490 027 ext.1
